“មហិច្ឋតានិងទស្សនវិស័យវែងឆ្ងាយ ជាសម្រស់របស់មេដឹកនាំ”
“ភាពបរិបូណ៌ដោយទស្សនទាន គោលលដៅ ការប្តេជ្ញាចិត្ត និងការទទួលខុសត្រូវជាកត្តាដែលជម្រុញឲ្យមនុស្សក្លាយមេដឹកនាំ”
(ទស្សនាទាន៖ ម៉ៃ រ៉ាម)
មេដឹកនាំកំពូលត្រូវមានមហិច្ឆតាឥតព្រំដែន ក្នុងការដឹកនាំ ។ មេដឹកនាំត្រូវមានឧត្តមគតិនិងទស្សនវិស័យ ដែលជាអាវុធសម្រាប់ត្រួសត្រាយផ្លូវក្នុងពេលអនាគតដ៏ភ្លឺស្វាងនិងជួយពង្រឹងមហិច្ឆតា ឲ្យកាន់រឹងមាំឡើង ។ មេដឹកនាំដ៏កំពូលតែងជួយជម្រុញទឹកចិត្តរបស់អ្នកក្រោមបង្គាប់បញ្ជា ឲ្យក្លាយជាមនុស្សដែលសកម្មការងារនិងជួយលើកទឹកចិត្តរបស់ពួកគេ ឲ្យទទួលបានជោគជ័យក្នុងគោលដៅរបស់ពួកគេ រួមគ្នា។ មេដឹកនាំល្អត្រូវតែជួយជម្រុញទឹកចិត្តរបស់អ្នកក្រោបង្គាប់ ឲ្យគិតថា៖ “វាជាការដើរទៅរកគោលរួមគ្នានិងជោគជ័យរួមគ្នា” ។ មេដឹកនំាតែងមានទស្សនៈច្បាស់លាស់និងប្រាកដនិយម ចំពោះអនាគតរបស់ពួកគេដែលពួកគេចង់បង្កើតឡើង ហើយពួកគេ ក៏មានសមត្ថភាពគ្រប់គ្រាន់ក្នុងបញ្ជួន ឬ ផ្ទេរទស្សនៈនេះ ទៅឲ្យអ្នកដទៃទៀត ក្នុងមធ្យោបាយមួយដ៏ប្រសើរ ។ ប្រសិនបើអ្នកចង់ក្លាយជាមេដឹកនាំដ៏កំពូល អ្នកចាំបាច់ត្រូវតែអនុវត្តតាមទ្រឹស្តីបីនៃការដឹកនាំដ៏អស្ចារ្យនិងជាគំរូដ៏ប្រសើររបស់អ្នកក្រោមបង្គាប់បញ្ជា ។
១/ទ្រឹស្តីនៃជោគជ័យដ៏កំពូល
ទ្រឹស្តីនៃជោគជ័យដ៏កំពូលបាននិយាយថា៖ “មេដឹកនាំល្អត្រូវតែតាំងចិត្ត ប្តេជ្ញាក្នុងការរត់រក ឬ ទទួលយកជោគជ័យដ៏កំពូល” ។ មេដឹកនាំល្អតែងដឹងថា៖ “ភាពល្អឥតខ្ចោះ ជាផ្លូវដំណើរដែលគេត្រូវតែដើរ មិនមែនជាគោលដៅ” ។ មេដឹកនាំតែងមានវីរិយភាពជានិច្ច ។ ពួកគេខិតខំប្រឹងប្រែង ក្នុងការឈានទៅរកតំបន់ ឬ ទីតំាំងលទ្ធផលពិសេសរបស់ពួកគេនិងខិតខំប្រឹងប្រែងក្នុងការក្លាយខ្លួន ជាបុគ្គលគំរូនៃអ្នកក្រោមបង្គាប់បញ្ជា ដែលរឹងរឹតតែធ្វើឲ្យពួកគេមានទំនុកចិត្តលើខ្លួន ។ ពួកគេស្អប់អ្វីដែលអសមត្ថភាពនិងការអនុវត្តខ្សោយ ។ មេដឹកនាំត្រូវការគុណភាពការងារនិងតស៊ូប្តេជ្ញាចិត្តថា៖ “មនុស្សក្រោមបង្គាប់ត្រូវតែធ្វើបានល្អ” ។ មេដឹកនាំតែងកំណត់បទដ្ឋាននៃសុក្រឹត្យភាព ។ គ្មានបុគ្គលណាម្នាក់ គ្មានផ្នែកណាមួយនៃអង្គភាព អាចនឹងប្រសើរជាងបទដ្ឋានដែលមេដឹកនាំបានកំណត់និងដាក់កំហិតឡើយ ។ សម្រាប់ហេតុផលហ្នឹង មេដឹកនាំត្រូវតែប្តេជ្ញាចិត្តក្នុងការចាប់យកសុក្រឹត្យភាពផ្ទាល់ខ្លួននិងទទួលជោគជ័យក្នុងការអនុវត្តនូវអី្វគ្រប់យ៉ាងដែលពួកគេបានធ្វើ ។
នៅពេលដែលមនុស្សដែលធ្វើការនៅក្នុងអង្គភាពមួយយ ដែលសុក្រឹត្យភាពត្រូវបានគេកំណត់ ពួកគេហាក់បីដូចត្រូវបានគេជួយជម្រុញទឹកឲ្យអនុវត្តនិងធ្វើដោយសប្បាយរីករាយ ។ យុទ្ធសាស្រ្តដ៏ប្រសើរបំផុត ក្នុងការជួយជម្រុញទឹកចិត្តនិងបង្កើនកម្លាំងអ្នកក្រោមបង្គាប់បញ្ជា គឺមេដឹកនាំត្រូវប្រកាសការប្តេជ្ញាចិត្តរបស់ខ្លួន ក្នុងការសម្រេចជោគជ័យកំពូល ។
មេដឹកនាំតែងបញ្ជាក់ពីសមត្ថភាពមូលដ្ឋានរបស់ខ្លួន ដែលជាកិច្ចការដ៏សំខាន់ចំពោះគោលដៅ ហើយពួកគេត្រូវតែទទួលខុសត្រូវលើវា ។ ពួកគេតែងសម្លឹងមើលទៅមុខជានិច្ច ដើម្បីបង្កើនសមត្ថភាពដ៏សំខាន់ទាំងអស់នេះនិងធានាថា៖ “ពួកគេនឹងទទួលបានជោគជ័យ” ។ មេដឹកនាំល្អតែងគិតពីអនាគតនិងតែងបញ្ជាក់នូវសមត្ថភាពមូលដ្ឋានដែលជាកត្តាមួយយដែលតម្រូវឲ្យមានការអនុវត្តដល់កម្រិតខ្ពស់បំផុត ។ បន្ទាប់មក ពួកគេបង្កើតគម្រោង ដើម្បីជួយជម្រុញឲ្យសមត្ថភាពនោះ ទទួលបានផលល្អ ។
២/ទ្រឹស្តីនៃសុចរិតភាព
ទ្រឹស្តីនៃសុចរិតភាពបាននិយាយថា៖ “ការអនុវត្តដល់កម្រិតកំពូលនឹងកើតឡើងលើរូបអ្នក នៅពេលដែលអ្នកសម្រេចចិត្តជ្រើសរើសយកជីវិតដែលតស៊ូប្តូរផ្តាច់លើគុណតម្លៃដ៏កំពូលនិងទស្សនៈដ៏ជ្រាលជ្រៅរបស់អ្នក” ។ មេដឹកនាំល្អត្រូវមានភាពស្មោះត្រង់និងការដោះស្រាយដោយស្មោះត្រង់ជាមនុស្សគ្រប់គ្នានិងគ្រប់កាលៈទេសៈ ។ តាមទ្រឹស្តីនៃសុចរិតភាពតម្រូវឲ្យអ្នកមានភាពស្មោះត្រង់ឥតខ្ចោះជាមួយខ្លួនឯងនិងអ្នកដទៃ ។ សុចរិតភាពជាមូលដា្ឋនគ្រឹះនៃមេដឹកនាំនិងជាបេះដូងនៃមេដឹកនាំ ។
អ្វីដែលមេដឹកនាំដ៏កំពូលគឺត្រូវធ្វើជាមេដឹកនាំគំរូសម្រាប់មនុស្សគ្រប់គ្នា ។ ត្រូវធ្វើខ្លួនឯងឲ្យជាគំរូល្អនៃអ្នកក្រោមបង្គាប់ ទាំងការនិយាយស្តីនិងការអនុវត្ត ។ ត្រូវធ្វើជាគំរូល្អ ទោះនៅក្នុងទីកំបាំងមុខអ្នកដទៃក្តី ។ មេដឹកនាំត្រូវធ្វើជាគំរូ ពីព្រោះ ពួកគេជាប្រភពនៃសេចក្តីទុកចិត្តរបស់មហហជនគ្រប់គ្នា ។ អ្នកក្រោមបង្គាប់នឹងទទួលយកពាក្យសម្តីរបស់មេដឹកនាំនិងទទួលយកការជឿជាក់នូវអ្វីដែលពួកគេនិយាយថា៖ “ពួកគេនឹងធ្វើ” ។ គំរូល្អគឺត្រូវគោរពតាមពាក្យសន្យានិងការទទួលខុសត្រូវ ។
សញ្ញាណដ៏សំខាន់នៃសុចរិតភាព ក្នុងការទាក់ទងមនុស្ស គឺភាពម៉ឹងម៉ាត់ទាំងខាងក្នុងនិងខាងក្រៅ ។ មេដឹកនាំកំពូលគឺត្រូវតែម៉ឹងម៉ាត់គ្រប់វិនាទីនិងគ្រប់ស្ថានភាព ។ ដោយសារតែភាពម៉ឹងម៉ាត់ខាងក្នុងហ្នឹងហើយ មេដឹកនាំត្រូវបានគេផ្តល់សេចក្តីជឿជាក់យ៉ាងមុតមាំ ។ មនុស្សក្រោមបង្គាប់តែងដឹងពីអ្វីដែលត្រូវរំពឹងទុក ។ គ្រប់យ៉ាងនឹងមិនមានភាពភ្ញាក់ផ្អើលឡើយ ។
៣/ទ្រឹស្តីនៃមហិច្ឆតា
ទ្រឹស្តីនៃមហិច្ឆតាបាននិយាយថា៖ “ដោយសារតែមេដឹកនាំល្អដែលមានមហិច្ឆតាដោយរឹងមាំ ទើបធ្វើឲ្យពួកគេមានទស្សនៈអនាគតល្អប្រសើរ ដែលខ្លួនបានប្តេជ្ញាចិត្តធ្វើ” ។ “ទស្សនៈ” ជាផ្នែកមួយដែលធ្វើឲ្យអ្នកដឹកនាំមានលក្ខណៈវិសេសវិសាលជាអ្នកក្រោមបង្គាប់ ។ មេដឹកនាំមានសមត្ថភាពគ្រប់គ្រាន់ក្នុងការកំណត់ទស្សនវិស័យដ៏វែងឆ្ងាយនិងបន្ទាប់មកជួយជម្រុញឲ្យអ្នកដទៃទៀត ចេះធ្វើការរួមគ្នា ក្នុងគោលបំណងធ្វើដំណើរឆ្ពោះទៅរកគោលដៅដូចគ្នា ។ មេដឹកនាំតែងមានមហិច្ឆតានិងទស្សនវិស័យខ្ពស់ជាងមនុស្សធម្មតា ហើយយល់ឃើញថា៖ “ការដឹកនាំជាឧបករណ៍មួយដែលខ្លួនអាចប្រើប្រាស់ក្នុងចាប់យកលទ្ធផលសំខាន់និងជាប្រយោជន៍ដល់មនុស្សគ្រប់គ្នា ។
អ្នកនឹងក្លាយជាដឹកនាំនៅពេលអ្នកបានកំណត់គោលដៅ បង្កើតគម្រោង ហើយបន្ទាប់បញ្ចូលបេះដូងរបស់អ្នកចូលក្នុងវិថីគម្រោងនោះ ដើម្បីធ្វើគម្រោងរបស់អ្នកឲ្យក្លាយជាការណ៍ពិត ។ អ្នកអាចក្លាយជាមេដឹកនាំពិតបាន នៅពេលដែលអ្នកអាចបង្កើតទស្សនៈជម្រុញទឹកចិត្តខ្លួនឯងនិងអ្នកដទៃ ។
មេដឹកនាំល្អ ឬ ជាគំរូអាចពន្យល់បានច្បាស់ពីអ្វីដែលពួកគេកំពុងព្យាយាមធ្វើឲ្យសម្រេច ដល់អ្នកដទៃបាន ព្រមទាំងអាចប្រាប់ពីហេតុផលដែលពួកគេកំពុងតែព្យាយាមនិងពីវិធីសាស្ត្រដែលពួកគេត្រូវធ្វើ ។ ពួកគេតែងរីករាយជាមួយអ្វីដែលពួកគេកំពុងធ្វើនិងលទ្ធផលរបស់ពួកគេ ព្រមទាំងធ្វើឲ្យអ្នកដទៃរីករាយជាមួយផងដែរ ។ មេដឹកនាំតែងមានគោលដៅ គម្រោង និងយុទ្ធសាស្ត្រដែលពួកគេកំពុងធ្វើនិងអនុវត្តប្រចាំថ្ងៃ ។ ពួកគេប្រញាប់ប្រញាល ពីព្រោះ ពួកគេតែងគិតថា៖ “ត្រូវតែធ្វើឲ្យបានច្រើន ពីព្រោះពេលវេលាសម្រាប់ពួកគេមានតិចណាស់” ។
សនិ្នដ្ឋានកថា
មេដឹកនាំល្អ ឬ ជាគំរូតែងមានទស្សនៈប្រាកដនិយម សុចរិតភាព គុណតម្លៃ គោលដៅ គម្រោង និងយុទ្ធសាស្រ្តច្បាស់លាស់សម្រាប់អង្គភាព ឬ ស្ថាប័នរបស់ពួកគេ ។ មេដឹកនាំទាំងអស់ ដែលប្រាថ្នាចង់ដឹកនាំគេ ត្រូវមានការទទួលខុសត្រូវ និងសិល្ប៍សាស្ត្រក្នុងជម្រុញទឹកចិត្ត ។ ពួកគេមានឆន្ទៈក្នុងទទួលយក ឬ ហ៊ានប្រថុយប្រថាន់នឹងគ្រោះថ្នាក់ ព្រមទាំងហ៊ានបូជាជីវិតទៀតផង ។
ដោយ៖ ម៉ៃ រ៉ាម
No comments:
Post a Comment